ಪಿ. ಕಿಶನ್ ಹೆಗ್ಡೆ ಅವರ ಸಮರ್ಥ ಯಜಮಾನಿಕೆಯಲ್ಲಿ ನಾನು ಕಂಡ ಅತ್ಯುತ್ತಮ ಟೀಮ್ ವರ್ಕ್ ಹೊಂದಿರುವ ಟೆಂಟ್ ಮೇಳಗಳಲ್ಲಿ ಸಾಲಿಗ್ರಾಮ ಮೇಳವೂ ಒಂದು. ಕಾಳಿಂಗ ನಾವಡರ ಕಾಲದಿಂದ ಹಿಡಿದು ಇಂದಿನವರೆಗೂ ಬಹುತೇಕ ಎಲ್ಲ ಪ್ರಸಿದ್ಧ ಕಲಾವಿದರು ಗೆಜ್ಜೆ ಕಟ್ಟಿ, ತಮ್ಮ ಪ್ರತಿಭೆಯ ಮೂಲಕ ಮೆರೆದಾಡಿದ ಹೆಗ್ಗಳಿಕೆ ಈ ಮೇಳದ್ದು. ಕಾಲಕ್ಕೆ ತಕ್ಕಂತೆ ಬದಲಾಗುವ ಹೊಸತನ, ಕಲಾವಿದರ ನಡುವಿನ ಅದ್ಭುತ ಹೊಂದಾಣಿಕೆ ಹಾಗೂ ತಂಡವಾಗಿ ಕೆಲಸ ಮಾಡುವ ಪರಿ.. ಇವೆಲ್ಲವೂ ಸಾಲಿಗ್ರಾಮ ಮೇಳದ ವಿಶೇಷತೆಗಳು.
ಯಾವುದೇ ಪ್ರಸಂಗವಿರಲಿ, ಅದಕ್ಕೆ ನೂರಕ್ಕೆ ನೂರು ಪ್ರತಿಶತ ಪರಿಶ್ರಮ ಹಾಕಿ, ಪ್ರೇಕ್ಷಕರ ಅಭಿರುಚಿಗೆ ತಕ್ಕಂತೆ ಮನರಂಜನೆ ನೀಡುವ ಸಾಮರ್ಥ್ಯ ಈ ಮೇಳಕ್ಕಿದೆ. ಇಂತಹ ಯಶಸ್ಸಿನ ಹಿಂದೆ ಸದಾ ಬೆನ್ನೆಲುಬಾಗಿ ನಿಂತಿರುವುದು ಮೇಳದ ಯಜಮಾನರ ಸಮರ್ಥ ಮಾರ್ಗದರ್ಶನ ಮತ್ತು ಕಲಾವಿದರ ಮೇಲಿನ ಅವರ ಕಾಳಜಿ.
ಈ ಬಾರಿ ಆ ಜವಾಬ್ದಾರಿಯ ಜೊತೆಗೆ ಮೇಳದ ವ್ಯವಸ್ಥಾಪನೆಯ ಚುಕ್ಕಾಣಿಯನ್ನು ಯಜಮಾನರ ಪುತ್ರ ಕನಿಷ್ಕ್ ಹೆಗ್ಡೆ ಹಿಡಿದಿರುವುದು ವಿಶೇಷ. ಇತ್ತೀಚೆಗೆ 'ತಿತ್ತಿತೈ ಪಾಡ್‌ಕಾಸ್ಟ್‌'ಗೆ ಅವರು ಅತಿಥಿಯಾಗಿ ಆಗಮಿಸಿದ್ದರು. ಮೊದಲ ಭೇಟಿಯಲ್ಲೇ ಆತ್ಮೀಯವಾಗಿ ಬೆರೆಯುವ ಸ್ನೇಹಮಯ ವ್ಯಕ್ತಿತ್ವ ಅವರದ್ದು. ಭೇಟಿಯಾದ ಕೂಡಲೇ ಗುರುತಿಸಿ, ಆತ್ಮೀಯವಾಗಿ ಮಾತನಾಡಿಸುವ ಅವರ ಗುಣ ನಿಜಕ್ಕೂ ಇಷ್ಟವಾಯಿತು. ಒಂದಷ್ಟು ಮಾತುಕತೆ, ಹರಟೆ, ಯಕ್ಷಗಾನದ ಕುರಿತಾದ ವಿಚಾರ ವಿನಿಮಯ ಎಲ್ಲವನ್ನೂ ದಾಖಲಿಸಿಕೊಂಡಿದ್ದೇವೆ. ಸದ್ಯದಲ್ಲೇ ಆ ಸಂಚಿಕೆ ನಿಮ್ಮ ಮುಂದೆ ಬರಲಿದೆ.
ಅವರೊಂದಿಗಿನ ಮಾತುಕತೆಯಲ್ಲಿ ಎದ್ದು ಕಂಡದ್ದು ಕಲಾವಿದರ ಮೇಲಿನ ಪ್ರೀತಿ, ಮೇಳದ ಭವಿಷ್ಯದ ಕುರಿತಾದ ದೂರದೃಷ್ಟಿ ಹಾಗೂ ಯಕ್ಷಗಾನ ಕ್ಷೇತ್ರದಲ್ಲಿ ಹೊಸತೇನನ್ನಾದರೂ ಮಾಡಬೇಕೆಂಬ ತುಡಿತ. ಹೊಸ ಆಲೋಚನೆಗಳು, ಹೊಸ ಪ್ರಯತ್ನಗಳು ಮತ್ತು ಮೇಳವನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯಬೇಕೆಂಬ ಉತ್ಸಾಹ ಕಂಡಾಗ ಸಹಜವಾಗಿಯೇ ಖುಷಿಯಾಯಿತು. ತಂದೆಯವರ ಮಾರ್ಗದರ್ಶನದಲ್ಲಿ ಮೇಳವನ್ನು ಮುಂದುವರೆಸುವ ಇವರ ಆಲೋಚನೆ ವಿಶೇಷವಾದದ್ದು.
ಇನ್ನೊಂದು ಕುತೂಹಲಕಾರಿ ಸಂಗತಿಯೆಂದರೆ, ಈ ವರ್ಷದ ಸಾಲಿಗ್ರಾಮ ಮೇಳದ ತಿರುಗಾಟಕ್ಕೆ ಅವರದೇ ಪ್ರಧಾನ ಪ್ರಸಂಗ 'ಹರಿ ಓಂ'. ಕುತೂಹಲವನ್ನು ಕೊನೆಯವರೆಗೂ ಕಾಯ್ದುಕೊಳ್ಳುವ, ಪ್ರೇಕ್ಷಕರನ್ನು ಆಸನದಿಂದ ಕದಲದಂತೆ ಹಿಡಿದಿಟ್ಟುಕೊಳ್ಳುವ ಸಾಮರ್ಥ್ಯವಿರುವ ಕಥಾವಸ್ತು ಎಂಬ ನಿರೀಕ್ಷೆ ಅವರದ್ದು. ಇದೇ ನವೆಂಬರ್ 27ರಂದು ಶಿರಿಯಾರದಲ್ಲಿ ಈ ಪ್ರಸಂಗದ ಮೊದಲ ಪ್ರದರ್ಶನ ನಡೆಯಲಿದೆ.
ಈ ಪ್ರಸಂಗದ ಬಗ್ಗೆ ಕನಿಷ್ಕ್ ಅವರಿಗೆ ಅಪಾರ ನಿರೀಕ್ಷೆಯಿದೆ. ಈಗಾಗಲೇ ಮೊದಲ ಹಂತದ ಪ್ರಯೋಗಗಳು ನಡೆಯುತ್ತಿವೆ. ಕಥಾವಸ್ತುವನ್ನು ಕೇಳಿದವರು, "ಇಂತಹದ್ದೊಂದು ಕಥೆಯನ್ನು ಯಕ್ಷಗಾನದಲ್ಲಿ ಈ ಹಿಂದೆ ಕೇಳಿದ ನೆನಪಿಲ್ಲ" ಎಂಬ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ ಎಂದು ಅವರು ಹೇಳುವಾಗ, ಸಹಜವಾಗಿಯೇ ನಮ್ಮಲ್ಲೂ ಈ ಪ್ರಸಂಗದ ಮೇಲಿನ ಕುತೂಹಲ ಮತ್ತಷ್ಟು ಹೆಚ್ಚಾಯಿತು. ಹೊಸ ಕಥೆ, ಹೊಸ ನಿರೂಪಣೆ ಮತ್ತು ಹೊಸ ಪ್ರಯೋಗ – ಇವೆಲ್ಲವೂ ಸೇರಿ 'ಹರಿ ಓಂ' ಹೇಗೆ ಮೂಡಿಬರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
ಒಟ್ಟಿನಲ್ಲಿ, ಹೊಸ ಹುರುಪು, ಹೊಸ ಆಲೋಚನೆ ಮತ್ತು ಹೊಸ ಸಾರಥ್ಯದೊಂದಿಗೆ ಸಾಲಿಗ್ರಾಮ ಮೇಳ ಮತ್ತೊಂದು ಯಶಸ್ವಿ ತಿರುಗಾಟಕ್ಕೆ ಸಜ್ಜಾಗುತ್ತಿರುವುದಂತೂ ಸ್ಪಷ್ಟ. ಅನುಭವಿ ಕಲಾವಿದರ ತಂಡ ಹಾಗೂ ಹೊಸತನದ ತುಡಿತವಿರುವ ಪ್ರಧಾನ ಪ್ರಸಂಗ ಮತ್ತು ವ್ಯವಸ್ಥಾಪಕತ್ವ – ಇವೆಲ್ಲವನ್ನೂ ಗಮನಿಸಿದರೆ ಈ ಬಾರಿ ಸಾಲಿಗ್ರಾಮ ಮೇಳ ಏನೋ ಒಂದು ಹೊಸ ಟ್ರೆಂಡ್ ಸೃಷ್ಟಿಸುವ ಪ್ರಯತ್ನದಲ್ಲಿರುವಂತೆ ಭಾಸವಾಗುತ್ತದೆ.
ಕಲಾವಿದರಿಗೆ, ಹೊಸ ಸಾರಥ್ಯಕ್ಕೆ ಹಾಗೂ 'ಹರಿ ಓಂ' ಪ್ರಸಂಗಕ್ಕೆ ಹಾರ್ದಿಕ ಶುಭಾಶಯಗಳು. ನೂರಾರು ಸಾವಿರಾರು ಪ್ರದರ್ಶನಗಳತ್ತ ಸಾಗಲಿ. ಗಜಗಟ್ಟಿ ಸಾಲಿಗ್ರಾಮ ಮೇಳ ಸದಾ ಗಜಗಟ್ಟಿಯಾಗಿಯೇ ಉಳಿಯಲಿ. ಹೊಸ ಪಯಣಕ್ಕೆ ಶುಭವಾಗಲಿ.
ಧನ್ಯವಾದಗಳು.
-ಪಿ.ಕೆ. ಜೈನ್ ಚಪ್ಪರಿಕೆ
